Huu ni
ushuhuda unaotokana na kitabu kinachojulikana kama Baptized by Blazing Fire,
Devine Expose of Heaven and Hell kilichoandikwa na Mchungaji Yong-Doo Kim wa
Korea. Ni ushuhuda mrefu ambao utakupa mafundisho, maonyo, utakutia moyo na
kukuimarisha katika safari yetu ya kuelekea kwa Baba, Mbinguni.
==== SIKU YA 8 ====
Pastor Kim, Yong-Doo
Ilishapita
kama wiki nzima tangu tuazimie kufanya maombi. Mapambano yetu kwenye ulimwengu
wa roho yaliongezeka, na majaribu yetu ya kimwili nayo yaliendelea kila siku.
Shujaa wa maombi mmoja baada ya mwingine alifunguliwa macho ya rohoni na
alijazwa kwa Roho Mtakatifu. Nguvu za kipepo zilifanya mashambulizi makubwa.
Hali mbalimbali za kibinafsi ziliinuka, huku zikijaribu hasira zetu. Siku ya
kwanza, tairi moja la gari langu lilipasuka. Siku iliyofuata, tairi la mbele
nalo lilipasuka. Hali ile ilinichanganya sana. Hata hivyo, sikumlalamikia
Mungu, badala yake nilipaza sauti "Haleluya"
kwa moyo wa shukrani. Siku iliyofuata gari la breakdown liliondoka na gari
langu. Jambo hili kwa kweli kidogo linitoe kwenye mstari sahihi. Lakini mke
wangu pamoja na washirika wenzangu walinikumbusha wakisema, "Mchungaji, ni lazima uvumilie katika
hili." Baadaye, kuna mtu alivunja taa za gari, na siku iliyofuata, mtu
mwingine alilikwaruza kwa kitu kikali.
Ibada
iliendelea kadiri Roho Mtakatifu alivyotuongoza. Hadi wakati huo, kichwa cha
habari kwenye ubao wa matangazo wa
kanisa kilisomeka: "Saa ya Mazingira Yaliyojaa
Uwepo wa Roho Mtakatifu," lakini kilibadilishwa na kuwa, "Ibada Halisi Inayoongozwa na Roho Mtakatifu."
Taratibu zote za kuabudu, kuomba, mahubiri na matoleo ziliondolewa, tukawa
tunafuata mwongozo wa Roho Mtakatifu – Yeye ndiye aongoze namna tutakavyoabudu,
tutakavyoomba, na mahubiri yatakavyotolewa. Mahubiri yangeweza kuendelea maana hatukuwa
na haraka ya kumaliza ndani ya muda maalum.
Kila shujaa
wa maombi alikuwa anaona uwepo wa Yesu wakati wa maombi ya mkesha wa usiku
kucha. Kwa hiyo, walikuwa hawajisikii kuchoka japokuwa ibada iliendelea hadi
asubuhi inayofuata. Saa zote tulikuwa macho na hakukuwa na muda wa kuzubaa
maana mapepo yanashambulia bila kupumzika.
Kim, Joo-Eun
Nilikuwa
naomba kwa lugha pale Yesu alipokuja kwangu na kusema, "Joo-Eun, nakupenda."
Akaendelea kusema, "Joo-Eun, omba kwa bidii, nami nitakwenda nawe hadi Mbinguni. Omba bila
kukoma. Nitakuonyesha Mbingu. Je, unanielewa?"
Baadaye
usiku ule, mashetani yalitokea kwa makundi. Mojawapo lilionekana likipigapiga
mabawa yake kama popo, huku likiwa na pembe ndogo kwenye vichwa na macho yake
kama paka. Shetani hilo liliruka kuelekea kwangu ilhali limepanua kinywa, huku
ute unaonata ukimwagika toka mdomoni mwake. Macho yake yalikuwa mekundu sana.
Nikasema kwa sauti, "Katika Jina
la Yesu, nakuamuru ewe pepo mchafu, ondoka kwangu!" Niliposema hivyo,
lilitoweka. Baada ya muda mfupi, pepo jingine lenye uso wa buluu na macho
madogo likawa linanijia. Nikapiga kelele, "Kwa jina la Yesu, ondoka
kwangu." Lakini shetani lile wala halikushituka! Badala yake
liliendelea tu kunikodolea macho. Nilipaza sauti kwa nguvu zaidi na nikajawa na
hofu ndipo Dada Baek, Bong-Nyo, ambaye alikuwa amekaa pembeni yangu, aliungana
nami kupaza sauti, "Kwa Jina la Yesu, ondoka kwetu!" Hapo tu
ndipo lilipokimbia.
Niliendelea
na maombi hatimaye joka kubwa jekundu likawa linaruka kuelekea kwangu. Macho
yake yalikuwa ya kijani. Kichwani kulikuwa na pembe ndefu, kali. Moshi ulikuwa
unatoka puani mwake. Lilikuja kwangu kwa nguvu kama vile lilitaka kunimeza hai.
Sikutetereka! Nilisimama kwa ujasiri, huku nikiomba kwa bidii kwa lugha kwa
Jina la Yesu. Ghafla likatoweka. Nilijisikia vizuri sana. Sikuwa najua uwezo
uliomo ndani ya Jina la Yesu kabla ya hapo. Safari nyingine, pepo baya, la
kutisha lenye kichwa ambacho ni fuvu lilicheka mbele ya uso wangu kana kwamba
lilikuwa likinidhihaki. Safari hii tena niliomba kwa lugha huku nikitumia Jina
la Yesu kulifukuza.
Baadaye,
nilikuwa nawaza juu ya Yesu akiwa amening’inia msalabani, ndipo alinitokea,
huku akinitia moyo, akisema, "Joo-Eun, hebu zaidi kidogo, omba kwa muda zaidi kidogo tena."
==== SIKU YA 9 ====
Lee, Haak-Sung
Mashambulizi
makali ya mashetani yalianza. Joka jekundu ambalo Joo-Eun alinisimulia
lilinitokea na mimi pia. Ukubwa wake uliniogopesha. Lilikuwa na macho ya
kijani, na moshi mweusi ulitoka puani mwake. Meno yake yalikuwa makali kama
pembe; kucha zake zimechongoka na mkia wake ulikuwa mrefu sana. Hata hivyo,
niliomba kwa bidii, nalo likatoweka! Muda mfupi baadaye, shetani la kike
likatokea huku likipiga kelele, "Hee-hee-hee!"
Mdomo wake ulijaa meno kama ya mbweha. Kisha nikaanza kusikia sauti ya mabuti
ya jeshi vikitembea nyuma yangu. Na mara vivuli vyeusi vikanifunika. Makelele
ya mashetani na sauti ya mabuti vilinitisha, kwa hiyo nikaanza kulia, "Bwana,
nisaidie! Tafadhali nisaidie!" Nilikuwa namwita Bwana ndipo Yesu
akatokea kwenye nuru kali. Mapepo yakatoweka mara Yesu alipotokea! Yesu
alinishika mkono, nami nikaimba na kucheza pamoja naye.
Baadaye,
Yesu aliniita, "Mpendwa
wangu, Haak-Sung, unataka kutembelea Mbinguni?" Mara
aliponishika mkono, mwili wangu ukawa umevikwa vazi jeupe. Nilielea hewani, na
tukawa tunapaa kuelekea kwa malaika wa Mbinguni waliokuwa wakitusubiri.
Sikuweza kuinua kichwa changu sawasawa kutokana na ukali wa nuru. Mbingu
inaweza kuelezwa kama sehemu iliyojaa nyota. Nilidhani ninaota, lakini Mbingu
ilikuwa ni halisi kuliko hata dunia. Mbingu yote ilikuwa imefunikwa kwa
dhahabu. Hakukuwa na sehemu ambayo haitoi nuru. Malaika na watakatifu wengi
walikuwa wakipita huku na kule, na malaika walinisalimu kwa furaha. Nikasema,
"Yesu, nataka kujua kama kuna nyumba yangu hapa." Kisha
Yesu akatuma malaika wawili wanisindikize hadi iliko nyumba yangu. Nyumba yangu
haikuwa kubwa, lakini kuta zake zilikuwa za matofali ya dhahabu! Niliona
bustani kubwa sana ya maua ambayo ilijaa maua ya aina mbalimbali. Nilitamani
kurukia humo ndani na kuanza kubiringika. Kutokana na harufu nzuri ya maua,
nilijawa na furaha na nikarukaruka kama mtoto.
Lee, Yoo-Kyung
Nilikuwa
naomba kwa lugha ndipo shetani likanijia. Kulikuwa kovu la X la mishono kwenye
jicho lake la kulia na la kushoto lilionekana kama doa jeusi. Pepo hilo lilionekana
kama ni la kiume. Nikapaza sauti, "Kwa
Jina la Yesu, toweka!" Baadaye, lilikuja pepo ambalo lilikuwa na
mabawa kama ya popo. "Nilikukosea nini hadi
unighasi kiasi hiki?" lilinisihi, "Hey, sitarudi tena kama utaniruhusu niingie ndani yako na
kutoka mara moja tu." Nikasema, "Ewe pepo mchafu; kwa
Jina la Yesu, ondoka mbele yangu!" Niliposema hivyo, likatoweka. Baada
ya hapo, nilipambana na mapepo mengine matatu au manne hivi tofauti. Kisha
ghafla, nilihisi harufu nzuri imenizunguka. Yesu alikuja na kuniita jina langu.
"Mpendwa wangu,
Yoo-Kyung, nipe mkono wako." Kwa hiyo, nikanyoosha mkono
wangu na Yesu akanishika mikono yangu kwa mikono yake kwa upole. Nikasema,
"Yesu, bega langu linauma sana," na Yesu akaweka mkono wake
juu ya mabega yangu, na maumivu yakaondoka.
Yesu alimpa
kila shujaa wa maombi jina la utani. Ilikuwa ni furaha sana. Yesu aliniita mimi
"Speckle face" (Usomadoa) kwa sababu uso wangu una madoadoa mengi.
Joo-Eun alipewa jina la "Sesame" au "Freckles" (Mabaka) kwa
sababu amefunikwa na mabakamabaka.
Baadaye,
Yesu alinifariji kwa sababu ya maumivu yote niliyopitia kutokana na kuwaona
ndugu zangu kule kuzimu. Alisema, "Mpendwa wangu, Yoo-Kyung, ulilia sana baada ya
kukutana na bibi yako kule kuzimu." Bwana akanikumbusha, "Yoo-Kyung, nitakapokupeleka
kutembelea kuzimu, usitoe msaada kwa mtu yeyote, hata kama ni bibi yako
mpendwa. Usije kujaribu kushika mkono wa mtu yeyote kule."
Baadaye Yesu
alinipeleka tena kutembelea kuzimu. Safari hii nilimwona baba yangu na mdogo
wangu wa kiume wa miaka 26. Huyu alijiua kwa kunywa sumu. Wote walikuwa uchi.
Macho yao yaligongana na yangu. "Dada
yangu mkubwa, Bong-Nyo, umefikaje huku? Huku si mahali pako. Dada, mwombe
Bwana. Fanya haraka umwombe anitoe humu. Nisaidie niende Mbinguni. Sasa!"
Kutokana na kilio na kusihi kwake, kaka yangu alitupwa kwenye mtungi wa kitu
kama maji yaliyokuwa yakichemka. Sikusikia yakichemka.
Tangu nikiwa
mdogo, baba yangu alinidharau, na chuki hiyo iliongezeka mwaka hadi mwaka. Tulipoonana
kuzimu, baba yangu akasema, "Bong-Nyo, nilipokuwa hai, nilitenda mambo
mengi mabaya ambayo nayajutia sasa. Nadhani ndiyo sababu niko hapa sasa.
Ninatubu sana kwa hayo yote." Nikamwuliza Yesu, "Bwana, kwa
nini baba yangu yuko hapa?" Akasema, "Baba yako ametenda dhambi sana. Hakuniamini Mimi,
lakini pia alikuwa akicheza kamari kila siku bila kukosa hata siku moja. Mama
yako alipokuwa ana ujauzito wa mdogo wako huku bado mwezi mmoja ajifungue akiwa
mwenye afya na kwa njia ya kawaida, baba yako aliondoa uhai ule wa thamani kwa
kumpiga mama yako ngumi tumboni. Mtoto
aliumia tumboni na kufa. Baba yako pia alikulazimisha wewe kuzika kitoto
kikiwa bado hai mlimani. Kwani huyajui hayo? Baada ya kutenda dhambi hiyo
mbaya, hakuwahi kukiri wala kutubu. Ni sahihi yeye kuwapo hapa kuzimu!"
Sauti ya Yesu ilijaa ghadhabu.
Niliona sura
nyingine ninayoifahamu. Ilikuwa ya mama mkwe wa mdogo wangu wa kike. Aliomba
kabisa kwamba nitakaporudi duniani, nimwambie mkwe wake na familia yake
wamwamini Yesu Kristo, waombe kwa bidii, ili kwamba wote waende Mbinguni.
Akasema, "Kwa kweli sikujua kuwa kuna kuzimu, au jinsi kulivyo kwa moto
na kubaya hapa. Nilikuwa ni shemasi kanisani, lakini sikuwa nikitumika
kanisani. Nilikuwa na miungu mingi duniani, nayo ilininajisi. Ndiyo maana niko
hapa. Najuta sana," alisema kwa sauti. Kisha alitupwa kwenye yale
maji ya moto vilevile.
Niliogopa na
kuhuzunika sana. Sikuweza kustahimili tena. Uso wangu ulijaa machozi, na harufu
ya kuungua ilifanya kupumua kwangu kuwe kwa shida. Yesu naye aliendelea kutoa
machozi. Bwana alikuwa na somo la muhimu kwa ajili yangu: "Una nafasi moja tu Mbinguni; na
hiyo ni wakati ukiwa bado hai kimwili." Sikuwa na cha kufanya
zaidi ya kuwaangalia wakiteseka. Moto wa kuzimu hauwezi kulinganishwa na moto
wa duniani.
Lee, Yoo-Kyung
Baada ya
kuomba hadi saa 1:30 asubuhi, nilirudi nyumbani nikitumaini kulala kidogo,
lakini nilihisi uwepo fulani chumbani. Nilifungua macho yangu, lakini sikuona
chochote. Nilipofunga tena macho yangu, “Yesu” alikuwa amekaa pembeni yangu.
Hofu ya ghafla iliniingia. Niliomba kwa lugha kwa ujasiri. Ghafla, yule ambaye
nilidhani ni Yesu aligeuka na kuwa pepo jeusi, likiwa na macho ya buluu nyeusi!
Pepo lile lilizungusha macho yake, na huku limeinua mkono wake, lilijaribu
kusema Sala ya Bwana. Kisha lilipaza sauti, "Mapepo
yote inukeni!" Niliogopa sana. Kwa sauti yenye amri nilisema,
"Ewe shetani, kwa Jina la Yesu, ondoka!" Mara moja lile pepo
lilitoweka.
ITAENDELEA ...
No comments:
Post a Comment